Иако се појавија вести дека испораката на гас за Полска и Бугарија е продолжена, по вчерашните објави за нејзино стопирање, од „Гаспром“ го демантираат тоа. На официјалната страница на компанијата е објавено соопштение во кое се потврдува дека дистрибуцијата на гас за двете земји е запрена, бидејќи до крајот на денот, на 26 април, не добиле исплата во рубљи.
„Уплатите за гас од 1 април мора да бидат во рубљи и купувачите се известени за тоа. За стопирањето на испораката се известени и бугарски „Булгаргас“ и полски ПГНиГ. Бугарија и Полска се транзитни земји. Во случај на неутрализирано земање на гас од количините наменети за трети земји, до кои се дистрибуира преку Бугарија и Полска, таа количина ќе се намали за одземениот волумен на гас“, се наведува на страницата на „Гаспром“.
Физичките текови на гас во Полска и во Бугарија паднаа на нула по вчерашната објава, но претпладнево, во еден момент, испораката на гас повторно продолжи. Тоа предизвика конфузија за компанијата да се огласи и да потврди дека дистрибуцијата на гас за двете земји е запрена.
Полска планира да престане да купува гас од Русија до крајот на годината, кога истекува и договорот со „Гаспром“. Дотогаш треба да биде завршен и новиот гасовод кој ќе ја снабдува земјата со енергенс од Норвешка.