Еден постар жител на Шангај по грешка беше прогласен за мртов и одведен во мртовечница во жолта вреќа, како најнов знак на нефункционирањето на градот погоден од Ковид, каде што милиони луѓе остануваат во локдаун што го спроведува владата.
Видео снимката, снимена од случаен минувач, го покажува моментот кога неколку работници облечени од глава до пети во заштитна опрема се оддалечуваат додека сфаќаат дека човекот е сè уште жив. Снимката оттогаш стана вирална на кинеските социјални мрежи, предизвикувајќи ужас и бес.
На видеото, објавено во неделата, се гледа како главата на човекот — жител на старечки дом — се појавува од жолтата вреќа додека работниците ја креваат од возилото.
Лицето кое го снима видеото, очигледно од блиската зграда, може да се слушне како вели: „Домот за стари лица е таков хаос. Испратија жив човек во погребна кола и го прогласија за мртов.Тоа е неодговорно, навистина неодговорно“.
Видеото го прикажува моментот кога работниците на мртовечницата сфаќаат дека човекот е се уште жив.
На кинеската платформа Веибо, слична на Твитер, многумина изразија неверување дека може да се случи таква тешка грешка — особено во Шангај, кој долго време се сметаше за најпрогресивен и најмодерен град во Кина.
„Проблемите во Шангај овојпат се целосно откриени“, гласи еден популарен коментар на Веибо.
„Ова се смета за намерно убиство“, напишал друг корисник.
Многу други истакнаа дека човекот можел да биде погребан или кремиран доколку не бил откриен жив. „На владата не и е грижа… што се случува во Шангај? вели еден коментар.
Окружната влада реагираше на инцидентот во понеделникот, велејќи во соопштението дека стариот човек сега е во стабилна состојба.
Тројца функционери се отстранети од бирото за граѓански работи и канцеларијата за социјален развој во областа, а сменет е и шефот на старечкиот дом, се вели во соопштението.