Познато е дека повеќе од две-три години не успеваме да се договориме со колегите од Скопје зошто и како треба да се слави Гоце Делчев во двете земји како обединувачка историска личност. Причината е сложениот и длабоко контрадикторен однос меѓу историјата и политиката.
Ова го изјави Ангел Димитров, претседател од бугарска страна на Мешовитата бугарско-македонска комисија за историски прашања, на конференцијата „Европска перспектива за добрососедски односи меѓу Република Бугарија и Република Северна Македонија“, пренесе бугарската агенција БГНЕС.
„Историската слика на новиот југословенски комунистички проект, постоењето на македонска нација со вековни државотворни традиции, е целосно политички производ и таа станува задолжителна за постигнување на планираната тотална контрола во македонското време и простор“, вели Димитров.
Тој истакнал и дека денеска во билатералната заедничка комисија „ставот на колегите од Македонија е подреден на симбиозата меѓу политиката и историјата“. Според него, постигнувањето договор за главните историски прашања ќе биде знак дека можеби ќе има похармоничен однос меѓу историјата и политиката.
Димитров ги посочил, како што рекол, главните проблеми кои според него докажуваат дека за историчарите на Северна Македонија се уште се чека ослободувањето од притисокот на политиката.
„Фундаментална е нивната неподготвеност да ја прифатат дефиницијата за заедничка историја, вградена во самиот Договор за пријателство и добрососедство. Со тоа се заштитува неприфатливата за Бугарија линија на толкување на минатото, линијата на моделирање на јавните ставови во духот на антибугарскиот македонски национализам. Постои неспособност и неподготвеност на нашите колеги да ја напуштат идеолошката и политичката рамка во која се оковани повеќе од 75 години“, рече Димитров.
Тој ги повика македонските историчари „да преземат граѓанска одговорност и да станат израз на реалната можност за надминување на антибугарските постулати на македонизмот“.
„Време е историската наука во Северна Македонија да се ослободи од историските окови. Тоа би довело не само до професионална туку и до јавна катарза во духот на европските и демократските стандарди. Мешовитиот комитет за историски прашања не треба да биде искривено огледало на односот меѓу историјата и политиката“, рече Ангел Димитров.