Со или без опозиција, власта масовно вработува во пресрет на локалните избори, дели субвенции и земјоделски земјишта, иако активностите согласно законите треба да сопрат.
И покрај препораките на експертската јавност дека со вработувањата во предизборието се кршат законите, институциите продолжуваат да вработуваат. Четири нови огласи за привремени вработувања објавила Агенцијата за цивилно воздухопловство, Електрани на РМ, Универзитетот Кирил и Методиј веќе бара и авторска агенција преку која ќе ги исплаќа новите привремено вработени, а оглас за има и Јавното претпријатије од Виница, Солидарност. Никој не знае ниту колку луѓе ќе вработуваат ниту колку пари ќе потрошат, а не се знае ни зошто им е се потребни дополнителни работници.
Нов оглас за вработување на 1540 лица денес објави и Агенцијата за вработување, а мерката ја промовираше министерот за труд и социјална политика, Спиро Ристовски како дел од владините мерки за вработувања за 2013. За вработувања на ранливите групи, како деца без родители, самохрани родители и бездомни лица државата ќе одвои 72, 2 милиони денари.
Пред само две недели Агенцијата за вработување објави оглас до невработените лица за програмите за самовработување во кое најавија субвенции за 2000 вработувања во вредност од еден милион евра. Иако Собранието ги објави изборите уште на 15 Јануари, со што вработувањата и тендерите требаше да сопрат согласно законите, тоа не се случи.
Поранешни членови на Антикорупциската, кривичари и експерти од областа на администрацијата за Нова уште тогаш коментираа дека вратувањата се комплетно надвор од законот, а Антикорупциската постапува надвор од својот мандат.
И покрај пораките на експертите се уште се вработува, се делат субвенции, земојделски државни земјишта и други активности кои, според познавачите, законот ги препознава како изборен поткуп.