Триесет години по краткиот престој на Едит Кресон (1991-1992) на владиниот трон, тој од вечерва повторно ќе биде запоседнат од жена. Реизбраниот француски претседател Емануел Макрон попладнево ја назначи Елизабет Борн за нова премиерка на земјата, соопшти Елисејската палата.
Поранешната шефица на РАТП во 2017 година се приклучи на шефот на државата во неговиот прв мандат како министерка за транспортот, потоа за еколошката транзиција, а еден период мина и како минитерка за труд.
„Таа во неговиот петгодшен мандат ги отелотвори повеќето големи трансформации подобро од кој било друг“, забележа извор близок до Макрон.
Нејзиниот претходник, Жан Кастекс попладнево во Елисејската палата ја поднесе својата оставка до претседателот на Републиката. Во писмо тој зборува за „новата ера што се отвора“ и најавува дека ќе се држи подалеку од националниот политички живот. Но, претходно Кастекс, сепак, ќе мора да го мине традиционалниот трансфер на власта, со новиот шеф на владата.
Борн потоа, во договор со шефот на државата, ќе треба да го формира тимот што ќе ја сочинува извршната власт до изборите во јуни.