Поранешниот светски шампион во шах, Гари Каспаров и олигархот Михаил Ходорковски, опозиционери во егзил и критичари на рускиот претседател Владимир Путин, денеска се додадени на списокот на „странски агенти“ во Русија, соопшти руското Министерство за правда.
Терминот „странски агент“, што во превод значи „непријател на народот“ од советската ера, нашироко се користи во Русија против опозиционерите, новинарите и активистите за човекови права обвинети дека спроведуваат политички активности финансирани во странство.
Со назначувањето странски агент, едно лице или ентитет подлежи на голем број ограничувања и процедури под закана од строги казни. Меѓу другото, тие треба да го наведат статусот на сите свои објави.
Во ажурираниот список објавен на веб-страницата на министерството се наведува дека Михаил Ходорковски (58) и Гари Каспаров (59) имаат „извори“ во Украина за да ги финансираат своите активности.
Каспаров долго време се спротивставува на Владимир Путин и, речиси, десет години живее во егзил во САД. Ходорковски беше еден од најмоќните руски бизнисмени во текот на 1990-тите пред да му се спротивстави на Кремљ кога Путин дојде на власт во 2000 година. Тој мина десет години во затвор, меѓу 2003 и 2013 година, и оттогаш живее во егзил. Со години ја финансираше опозициската организација „Отворена Русија“, која се самораспушти во мај во 2021 година поради растечките репресии во земјата.