Денеска се очекува пресудата за Вадим Шишимарин, првиот руски војник обвинет за воени злосторства за време на инвазијата на Украина, кој за време на судењето призна вина за убиство на невооружен цивил.
Обвинителството вели дека Шишимарин командувал со единицата на тенковска дивизија, кога конвојот бил нападнат од украинските сили.
„Тој и уште четворица војници украле автомобил што го возеле во близина на Чупакивка. Таму сретнале 62-годишен Украинец на велосипед“, велат од Обвинителството.
Според обвинителот, на Шишимарин му било наредено да убие цивил, што го направил со автомат „Калашников“. Тој се соочува со доживотна казна затвор.
Украина вели дека досега идентификувала над 10.000 можни случаи на руски воени злосторства за време на инвазијата во земјата.
Москва негира дека нејзините војници пукаат во цивили, но истражителите веќе некое време собираат докази за воени злосторства, кои планираат да ги достават до Меѓународниот кривичен суд во Хаг.