Поминаа повеќе од десет дена, а претседателот на Собранието Талат Џафери, не само што не се извини за неговото безобразно однесување спрема вработените во собраниската служба туку се однесува како ништо да не се случило, изјави Дафина Стојановска, пратеник од ВМРО-ДПМНЕ и Коалицијата „Обнова за Македонија“, откако денеска пратениците со транспарент во собраниската прес служба побараа оставка од Џафери.
– Крајно е недозволиво токму од човекот кој што прв го потпишал етичкиот кодекс за однесување во Собранието, најгрубо да го крши и да бега од одговорност и заедно со пратениците од власта да пробуваат на секаков можен начин да го скријат под тепих овој скандал. Џафери најмалку што можеше да направи е да се извини за ваквото однесување и да си поднесе оставка од функцијата претседател на Собранието, вели Стојановска.
Таа додаде дека пратениците нема да дозволат да се заборави овој скандал и дека преку механизми кои се пропишани во Деловникот за проблемот ќе расправаат и на седница на Комисијата за деловнички и мандатно-имунитетни прашања.
Стојаноска го повика пратеникот Панчо Минов да не одолговлекува и да закаже седница на која што ќе се расправа за санкции по повот прекршувањето на етичкиот кодекс од страна на талат Џафери.
– Доколку Џафери не понесе одоговрност за ваквото однесување ќе даде до знаење до сите пратеници дека етичкиот кодекс на кој што сите заедно работевме, повеќе не важи во законодавниот дом, порача Стојановска.