Од 35 тестирани примероци на млеко, 29 имале покачена вредност на афлатоксин m1. Ова вчера го објави покраинскиот секретар на Војводина за земјоделие Горан Јешиќ на неговиот Твитер профил.
“Ситуацијата е алармантна и не гледам ниту една причина или приватен интерес млекото да не се повлече од продажба” напишал Горан Јешиќ на Твитер (најдолу погледнете ги резултатите од истражувањето кои Јешиќ ги објави на својот Твитер профил).
Во минстерството за земјоделие на Србија велат дека примероците со гранични вредности на афлатоксини дополнително се испитуваат.
Испитувањето на присуството на афлатоксините на пазарите во Србија започна минатиот викенд, кога министерството за земјоделие на Хрватска нареди повлекување од продажба на четири вида трајно пастеризирано млеко кое го произведуваат загрепски Дукат и вараждинска Винџија.
Босна и Херцеговина и Црна Гора веќе го забранија увозот на млека од Дукат и Винџија.
