Published: Tuesday, May 31, 2022 15:40
Добри вести! По многу напори на екипата на Територијалната противпожарна единица и доброволци, конечно е изгаснат пожарот во магацинот на фабриката “Пофикс“. Напорите од нашите херои го дадоа долгоочекуваниот резултат. Ваквите настани посакувам да не се повторат, со надеж дека иднината ќе биде добра и светла!, објави градоначалникот на Тетово, Биљал Касами, на својот Фејсбук профил.
Тој им се заблагодари на сите учесници кои, како што објави, помогнаа во овие два исклучително тешки дена.
Пожарот во Тетово избувна вчера околу 9:30 часот, а синоќа беше локализиран. Но до денеска попладне во градот се уште се чувствуваше чадот и непријатната миризба од големиот пожар во фабриката Пофикс.
Според податоците од мерењата на воздухот во Тетово објавени на Фејсбук страната на Министерство за животна средина и просторно планирање, како што претходно веќе објавивме, двојно се зголемени концентрациите на јаглерод моноксид, ПМ10 и ПМ 2.5 честички, и на други штетни гасови, а за шестпати е намалена концентрацијата на озон.