Мал приватен авион денес по грешка влегол во воздушниот простор во близина на летната куќа на претседателот Џо Бајден во Делавер, што предизвика кратка евакуација на претседателот и првата дама, соопштија Белата куќа и Тајната служба.
Белата куќа соопшти дека нема закана за Бајден или неговото семејство и дека се преземени мерки на претпазливост. Откако беше проценета ситуацијата, Бајден и неговата сопруга Џил се вратија во нивниот дом.
Во соопштението на Тајната служба се вели дека на авионот веднаш му била испратена воздушна придружба откако „по грешка влегол во забранет простор“. Агенцијата соопшти дека ќе го испрашува пилотот кој, според првичната истрага, не бил на соодветниот радио канал и не ги следел објавените упатства за летот.
Како што е стандардна практика за претседателските патувања надвор од Вашингтон, Федералната управа за авијација објавува ограничувања за летови пред посетата на Бајден на градот. Ограничувањата вклучуваат зона на забранети летови во радиус од 17 километри.
Федералните регулативи бараат пилотите да проверат дали има ограничувања на летот на нивната рута пред да полетаат. Сепак, случајните прекршувања на воздушниот простор, особено околу привремените забранети зони, се чести.
Американските воени авиони и хеликоптери на крајбрежната стража често се користат за пресретнување на сите авиони што влегуваат во затворената зона околу претседателот. Пресретнатите авиони се пренасочуваат кон блискиот аеродром каде што органите на редот ги испрашуваат воздушните екипажи кои се соочуваат со потенцијални кривични или граѓански казни.