Посвежиот временски бран, проследен со силен дожд и ветар, кој во текот на ноќта ги зафати, речиси, сите делови во Словенија, уништи дрвја и покриви, а пожарникарите мораа да испумпуваат вода од поплавените згради и да интервенираат на пожар што го предизвика молња.
Словенечката управа за цивилна заштита и помош при катастрофи соопшти дека невремето е низ целата земја, со исклучок на Приморска, а пријавени се вкупно 135 инциденти, со интервенција на 66 доброволни територијални противпожарни бригади и три професионални противпожарни бригади.
„Тимовите за интервенција имаа најмногу работа во источниот дел на земјата, каде што удари на гром оштетија неколку станбени и деловни објекти“, пренесува агенција СТА.
Пожарникарите интервенирале и на живинарска фарма во Словенска Бистрица за да спасат 3.000 кокошки од давење.
Поплавени се десетици патишта, а реката Пака се излеа од коритото и го урна мостот на локалниот пат Горњи Долиќ-Козјак.
Словенија неодамна доживеа многу вакви дождови, некои од нив проследени со силен град, во кој беа уништени сезонските култури, а беа оштетени и згради.