Украина денеска објави дека нема да ја деминира областа на црноморското пристаниште Одеса за да овозможи извоз на житни култури, наведувајќи ја заканата од руски напади врз градот како причина за тоа.
„Во моментот кога ќе го ослободиме пристапот до пристаништето во Одеса, руската флота ќе биде таму“, рече портпаролот на регионалната администрација Сергеј Брачук.
Тој додаде дека Русија „сонува како падобрански трупи влегуваат во градот“ и дека московската армија „сака да ја нападне“ Одеса.
Министрите за надворешни работи на Турција и на Русија денеска разговараа во Анкара за организирање на безбедносен коридор за отпремување на украинско жито што е заглавено во пристаништата поради руската блокада.
Рускиот министер за надворешни работи Сергеј Лавров изјави дека Москва е подготвена да овозможи безбеден премин на украинското жито.
Брачук потенцира дека секој извоз од Одеса мора да биде во придружба на „земјите на НАТО“.
Турција ги понуди своите услуги за придружба на поморски конвои од украинските пристаништа.
Пред војната, Украина беше четврти најголем извозник на пченица во светот и обезбедуваше половина од светската трговија со сончогледови семки и масло.
Украинскиот претседател Володимир Зеленски оваа недела предупреди дека количеството жито блокирано од војната може да се зголеми тројно во рок од неколку месеци.