Расчистена е кражбата на уметнички слики, предложен е притвор за едно лице, јави денес и скопското обвинителство откако утринава полицијата соопшти дека го фатила сторителот.
Информациите говорат дека сторителот, 33-годишен маж, на 26 и 27 јуни, два пати влегувал во книжарница на улицата „Ѓуро Стругар“ во Скопје, од каде противправно одзел 16 уметнички слики со вкупна вредност од 984.000 денари.
На 26 јуни, во раните утрински часови, тој со употреба на погоден алат и физичка сила, го скршил катанецот на задната влезна врата на книжарницата и од ѕидовите откачил и зел 6 уметнички слики од уметникот Павле Кузмановски. Настанот бил пријавен и биле преземени полициски дејства на лице место за откривање на сторител.
Меѓутоа, осомничениот следниот ден, на сличен начин го скршил катанецот на предната врата и од книжарницата одзел уште 10 уметнички слики од истиот автор.
Oценувајќи дека постои опасност од бегство на лицето како и веројатност тој да го повтори делото, особено затоа што се работи за лице кое и претходно е осудувано за ист тип кривични дела во земјава, но и во Германија, надлежниот јавен обвинител до судијата на претходна постапка од Основниот кривичен суд Скопје достави предлог за определување мерка притвор.