Овој извештај е искрен и јасен, со овие зборови евроамбасадорот во Македонија Аиво Орав им се обрати на новинарите на презентацијата на новиот извештај за напредок кој го изготвува Европската комисија.
-Извештајот не е само критичен туку тој треба да се гледа и како патоказ за спроведување на реформите. Главни грижи се зголемената политизација на државните институции, владината контрола врз медиумите, особено за време на избори, слободата на изразување, политичкиот дијалог, меѓуетничките односи, политичкиот дијалог и независноста на судството и борбата против корупцијата, рече Орав.
Индиректно, евроамбасадорот посочи дека Европската комисија го менува „тонот“ на разговор со владата, односно дека Македонија повеќе не може да очекува нова препорака во ситуација на влошување на состојбите од година во година, како што беше досега.
-Ако го споредите текстот од оваа година и од минатата година, ќе видите разлика, вака одговори евроамбасадорот Аиво Орав на новинарско прашање дали владата и следната година ќе помине „неказнето“ и ќе добие препорака доколку не ги спроведе реформите во областите кои комисијата ги наведува за критични ако се има во предвид дека состојбите во посочените области постојано се влошуваат, но власта секоја година може да се пофали со нова препорака.