Уставниот суд нема да поведе постапка за законот за абортус. Според мнозинството судии законот не го ограничува правото на жената слободно да одлучува дали ќе ја прекине бременоста или не, туку одредбите во него се во интерес на нејзиното здравје.
Според судијката Наташа Габер Дамјановска, овој закон воведува административна обврска за бремената жена и се ограничува нејзиното право да одлучува самата за себе. Таа вели жената треба да бара одобрување од државата за својот физички интегритет, со што се дискриминира бремената жена, која треба да бара одобрение од некои комисии за едно навистина интимно и сензитивно прашање.
За ниту една друга медицинска интервенција, тоа не е потребно. Зарем мора силувана жена да бара потврда од јавниот обвинител? Зарем мора мајка со мртов плод да чека три дена на писмено одобрение? Зарем мора малолетна девојка да добие дозвола од родителите, рече Габер Дамјановска.
Судијата Сали Мурати пак целосно се спротиставува на абортусот. Според него абортусот не е исклучиво право на мајката, туку и на таткото, на поширокото семејство и на општеството.
Ние треба да го заштитиме нероденото дете, чиј живот почнува со зачнувањето. Оваа година се регистрирани повеќе прекини на бременоста отколку породувања. Имало 30 илјади абортуси наспроти 24 илјади новороденчиња. Во светски рамки, секои 30 секунди има насилен прекин на бременост. Ако продолжи овој тренд, ќе се уништи човештвото, објасни Мурати.
Невладините организации кои ја поднесоа иницијативата пред Уставниот суд кусо искоментираа дека се вџашени од изнесувањето приватни а не правни мислења во Уставниот суд.
Невладините сметаат дека обврските за писмено барање, задолжително советување и чекање дозвола претставуваат на психичка, административна и временска тортура врз бремената жена.
Денешната седница на судот траеше околу два часа а поминати беа цели 18 точки.