Република Северна Македонија е целосно подготвена за отпочнување на процесот на пристапни преговори со Европската унија како и институциите за процесот на скрининг кој почнува од денеска. Горд сум што на мојот мајчин македонски јазик ќе се водат преговорите за време на целиот пристапен процес и што на македонски јазик ќе биде потпишан Договорот за полноправно членство а македонскиот јазик ќе биде еднаков со останатите 24 официјални јазици на Европската Унија, рече во својата изјава на меѓувладината конференција РСМ – ЕУ во Брисел, премиерот Димитар Ковачевски.
,,После 17 години чекање, после 17 години носење на тешки, важни, патриотски одлуки Република Северна Македонија денес ги започнува преговорите за полноправно членство во ЕУ. Во овој голем ден вградена е работата, трудот на сите граѓани на државата без разлика на нивната етничка, верска или било каква друга припадност. Вграден е трудот и работата на голем број лидери на државата од нејзиното осамостојување, од првиот претседател Киро Глигоров, премиерот Кљусев, преку претседателот Борис Трајковски, Црвенковски и другите премиери, министри на државата. Сите вработени во институциите кои работеа на подготовки на Република Северна Македонија за отпочнување на преговорите, изјави премиерот Ковачевски како дел од воведната изјава на меѓувладината конференција во Брисел.
„Ова е резултат и на големата одлука што граѓаните преку своите пратеници во Собранието ја донесоа во изминатите денови каде што многу јасно кажавме дека ние сме држава која што е Европа во мало и која што цивилизациски, историски и на секој друг начин припаѓа во ЕУ, рече премиерот Ковачевски.
Ковачевски прогнозира дека земјава ќе биде целосно подготвена за влез во ЕУ до крајот на 2030 година. Ова е последна етапа од овој долгоочекуван, заслужен, историски и децениски сон на многу политичари, влади, НВО – организации, медиуми, новинари, и ова им го посветуваме на сите нив, рече Ковачевски кој вети транспарентност во работењето и инклузивност за вклучување на опозицијата и на сите во општеството во пристапниот процес.
„ Денеска направивме голем пробив, Република Северна Македонија оди кон следна фаза во своите односи со ЕУ. Јас можам да ви кажам дека ние сме до вас за цело време на овој пат и ќе ви помогнеме на тоа патување, изјави шефот на европската дипломатија Жозеп Борел.
Тој се осврна на темата за идентитетот.
„На патот кон ЕУ нема да го загубите својот идентитет. Никој од нас не го губи. Вам не ви требаат заклучоци од Советот за да го знаете тоа. Вашиот идентитет ќе остане и ќе биде зголемен со другите идентитети, кои не се алтернативни, туку се надополнуваат. Затоа сме тука денес. Ни требате. Ни треба Северна Македонија за да го надополни нашиот сложен идентитет. Потребни сме си едни на други затоа што заедно сме посилни, истакна Борел.
Еврокомесарот за преговори за проширување и соседска политика Оливер Вархеји и го честита на Македонија почетокот на преговорите и напорите на чешкото и на француското претседателство за да се дојде до овој момент. Гласањето во саботата беше решителен чекор и чекор за носење на демократски одлуки за напредокот на вашата земја, рече Вархеји.
„Денешната конференција е заслужено признание за она што вашата земја го постигна изминативе години во унапредувањето на реформите. Северна Македонија продолжува да ги исполнува сите услови. Продолжете со добрата работа во интерните реформи и зацврстувањето на демократските институции, рече еврокомесарот за проширување.
„Клучно е да се остане во процесот и затоа ќе организираме уште една меѓувладина конференција веднаш по усвојувањето на уставните измени, на која внимание ќе посветиме на кластерот Основи во кој се поместени економските критериуми, политичките, судството …Комисијата е подготвена веднаш да почне со скринингот и ние тоа ќе го направиме уште попладнево, рече Вархеји.
Мирјана Трпческа