„Пожарот е веќе ставен под контрола, верувам дека денес или најдоцна утре ќе биде изгасен. Дури и да има чад, пожарот е веќе ставен под контрола, горат само грмушки но без дополнителна согорлива материја која може да предизвика поголем пожар“, изјави од местото на пожарот во беровско, директорот на Агенцијата за заштита и спасување Беким Максути.
„Можам да ја нагласам брзата реакција но и соработката што ја имаме меѓу институциите пред се Центарот за управување со кризи, и со локалната самоуправа, но и со доброволните друштва за кои што сакам навистина да упатам благодарност до сите тие кои што се денес тука со нас“, рече Максути.
За денес како што информира тој, била закажана вежба за гасење пожар на ДЗС, ЦУК и МВР во која требало да учествува хеликоптерската единица на полицијата, но синоќа со министерот одлучиле дека е подобро вежбата да се замени со вистинско гаснење на пожарот во Малешевијата.
„По согледување и проценка на сите чинители синоќа, заедно со директорот на ЦУК и со министерот за внатрешни работи Оливер Спасовски одлучивме наместо вежбата да ги насочиме сите сили и средства што ги имаме за гасење на овој пожар. И како што можете да видите прилично сме во ред, пожарот е ставен под контрола, во неколку наврати авионот дејствуваше а тоа го прави и во моментов се до целосно гаснење на овој пожар“, рече Максути.
Тој посочи дека шумските пожари се најчесто подметнати или предизвикани од невнимание и упати апел за поголема внимателност на граѓаните. „Апелирам до сите граѓани да бидат повнимателни и да пријават кога ќе видат нешто сомнително или пак да интервенираат и да се вклучуваат во доброволното гаснење на пожарите заедно со професионалците“, изјави директорот. (Р.Н.)