Во лекторатите на универзитетите во Риека, Истанбул и Будимпешта интересот за изучување на македонистиката е огромен, вели директорката на Меѓународниот семинар за македонски јазик, литература и култура при Универзитетот „Св. Кирил и Методиј“ во Скопје Весна Мојсова-Чепишевска.
Минатата година, на Универзитетот во Риека, македонскиот јазик го изучувале седумдесетина студенти, а на Истанбулскиот универзитет, на различни нивоа, бројот на студентите бил дури шеесет, додека за понатаму, може да се очекува да биде и значајно поголем, имајќи предвид дека од следната академска година, можност за изучување на македонистиката ќе имаат сите студенти на Универзитетот, а не само оние коишто студираат на Факултетот за литература. На Универзитетот во Будимпешта пак, минатата година, наставата по македонски јазик ја следеле триесетина студенти.
„Во сите учесници на летните, а од минатата година и на зимските школи, како и во сите професори, предавачи, лектори, преведувачи, студенти кои ги изучуваат македонскиот јазик, литература и култура надвор од нашата земја, ги имаме најголемите културни амбасадори, поддржувачи и верни пријатели. Ние веруваме во нив и во нивната мисија да продолжат во духот на досегашната дејност, а тоа е создавање пријатели и лобисти за Македонија кои ќе ги пренесат и ќе ги претставуваат македонскиот јазик, литература и култура во своите земји, па и пошироко во светот“, додава директорката.
Таа во интервју за списанието на Заедницата на Македонците во Хрватска „Македонски глас“, откри дека годишно над 250 странски студенти го изучуваат македонскиот јазик.
„За нас како Меѓународен семинар за македонски јазик, литература и култура, и за УКИМ под чија капа е Семинарот, но и за целата држава, сите лекторати се влијателни. Зашто ако се земат предвид сите, се доаѓа до една неверојатна бројка од над 250 студенти годишно што го изучуваат македонскиот јазик, литература и култура, на додипломски и постдипломски студии“, нагласува Мојсова-Чепишевска.
Изучувањето на македонскиот јазик и македонистиката, датира уште од поодамна. Во Лекторатот во Москва е при универзитетот „Ломоносов“ наставата по македонски јазик како главен предмет се изведува од академската 1975/76 година под водство на академик Рина Усикова. По нејзините стапки продолжија извонредните македонисти, академик Ала Шешкен и проф. д-р Елена Верижникова и заради нивната посветеност и висока професионалност расте овој исклучителен македонистички центар.
На Катедрата по македонистички студии во Париз, пак, при познатиот Национален институт за ориентални јазици и култури (ИНАЛКО) е еден од најстарите лекторати по македонски јазик. Во академската 2023/24 година ќе се одбележи голем јубилеј – половина век македонистика на ИНАЛКО, каде што денес македонскиот јазик се изучува и на додипломските и на постдиломските студии, вклучително и на докторските студии, под раководство на проф. д-р Фроса Пејоска-Бушро, која истовремено е и директорка на Школата за докторски студии при ИНАЛКО, открива Мојсова – Чепишевска.
Инаку, во август, во Охрид ќе се одржи 55. Летна школа за македонски јазик, литература и култура, на којашто се очекува учество на голем број странски слависти и македонисти, а потоа, во септември ќе се одржи и 49. Меѓународна научна конференција на македонистите при УКИМ. (Р.Н.)