Доцна вечерва пожарот во околината на Ѓавато (општина Богданци) повторно се разгоре и претставува закана за куќите. Подрачјето е зафатено од силен ветер, што дополнитено го распламтува огнот и ги држи жителите во неизвесност бидејќи од 13.30 часот досега постојано гори со променлив интензитет.
Жителите велат дека на терен и понатаму се пожарникарски екипи и доброволци од соседните општини, Дојран и Гевегелија. Околината е тешко пристапна.
Пред повеќе два часа, претставници од локалното население изјавија дека пожарот повеќе не е закана за куќите и дека е локализиран во делот кон селото. Во тие моменти можеа да се забележи пламени јазици со послаб интензитет и подалеку од куќите.
Од Центарот за управување со кризи, доцна вечерва соопштија дека огнот е пресечен и е под контрола на околу 150 метри од селото и дека е свртен во правец на црквата и гробиштата. Но, предупредија и дека во текот на ноќта постои опасност од негово повторно разгорување.
„Дежурните пожарникарски мешани екипи се распоредени со возила на 50 метри во линија пред селото и ќе се обидат да ја одбранат таа линија до утре наутро. Огнот за сега има зафатено само една стара куќа на перферија од селото, а пожарникарите ја гасат во моментов“, соопштија од ЦУК.
Пожарот кај Ѓавато и околината почнал околу 13:30 часот, информираше Центарот за управување со кризи. Во првите неколку часа имаше опасност за куќите во селото, но и за блискиот ветерен парк и пумпната станица за вода, која е дел од системот за полнење со вода на Дојранското езеро.
Пожарот засега се гаси само од земја. Дел поради дел временските услови, дел поради тоа што пожарот зеде замав во попладневните часови, не беше побарана хеликоптерска поддршка во гаснење на огнената стихија.