Холандски брод потона денеска во Северното Море во близина на Данска по судир со друг брод, соопшти данската морнарица, наведувајќи дека нема жртви.
Седум членови на екипажот на бродот „Хелге“ скокнале во морето и биле спасени со хеликоптер.
Не се познати деталите за судирот на бродот „Хелге“, долг 89 метри и поголемиот брод „Дивиот Космос“, кој плови под знаме на Бахамите.
Судирот бил на 37 километри од западниот брег на полуостровот Јитланд.
Данската морнарица испрати неколку бродови и два хеликоптера на местото на настанот. Спасените членови на екипажот на холандскиот брод се префрлени во болница.