Вицепремиерот за европски прашања, Бојан Маричиќ пред денешниот почеток на скрининг процесот со Европската Унија (ЕУ) испрати порака преку својот Фејсбук профил дека сè е подготвено за следната фаза од евроинтеграциите и дека македонскиот тим е спремен за отворањето на скриниг процесот.
„Преговорите се отворени. Денеска започнуваме нова фаза на евроинтегративниот пат и исполнување на нашата стратешка цел. Скринингот е важна задача за сите нас. Затоа сите да се обединиме околу оваа национална задача и да ја завршиме што е можно поскоро. Имаме добра основа и почитичка волја и капацитет да го направиме тоа“, напиша Маричиќ на својата Фејсбук страница.
Тој нагласува дека граѓаните сакаат и заслужуваат да живеат во европска Северна Македонија и да ги користат бенефитите што ги носи членството во Унијата.
„Нека ни е со среќа и успех!“, напиша Маричиќ на Фејсбук.
Северна Македонија по одржувањето на првата Меѓувладина конференција со која и официјално ги отвори преговорите со Европската Унија, денес започнува со првата фаза од преговорите, односно скриниг процесот.
Денеска почнува објаснувачкиот скрининг за Поглавје 5, Јавни набавки. Македонската делегација ја преводи вицепремиерот и главен преговарач Маричиќ, дел од делегацијата е и државната секретарка во СЕП и заменик на главниот преговарач Дрита Абдиу Халили, а исто така во делегацијата се вклучени и претставници од надлежните институции и од Секретаријат за европски прашања.
Од 15 до 27 септември 2022 година ќе се одвиваат состаноци за областите и поглавјата од Кластерот Фундаментални вредности, кога Комисијата ќе го презентира новото законодавство за овие области. Сите состаноци се одржуваат во Брисел, освен за Поглавјето 18 Статистика во Луксембург.