Издадени се 15.978 патни исправи на наши граѓани во странство и зголемен е бројот на барања за издавање на лични документи во 2022 година, споредбено со претходните години, објави министерот за внатрешни работи Оливер Спасовски на неговиот профил на Фејсбук.
Тој информира дека само во текот на јуни, на јули и на август оваа година се поднесени вкупно 91.138 барања за издавање на лична карта и 148.115 барања за издавање на патни исправи.
Според него, евидентна е големата разлика од бројот на барања што биле поднесени во 2017 година, во 2018 година и во 2019 година.
Во 2017 година (јуни, јули и август) се поднесени вкупно 40.110 барања за издавање на лична карта и 103.347 барања за издавање на патни исправи. Во 2018 година (јуни, јули и август) се поднесени вкупно 58.977 барања за издавање на лична карта и 107.126 барања за издавање на патни исправи. Во 2019 година (јуни, јули и август), пишува Спасовски, се поднесени вкупно 60.244 барања за издавање на лична карта и 124.263 барања за издавање на патни исправи.
„Големата разлика на бројот на поднесени барања во 2017 година, во 2018 година и во 2019 година, во споредба со тековната 2022 година, се должи на поставувањето на новите базни и мобилни станици во странство, во амбасадите и во генералните конзулати, почнувајќи од 1 октомври во 2021 година, и до 20 септември оваа година на 15.978 наши граѓани им помогнавме во издавањето на патни исправи“, напиша министерот за внатрешни работи на Фејсбук.
Со проектот за базни и мобилни станици, нагласува тој, го решивме деценискиот проблем на нашите граѓани од дијаспората – услугата за издавање патни исправи се олеснува и скратува, а се избегнуваат и гужвите на шалтерите на Управните служби.
„Исто така, со дигиталната трансформација на процесите на МВР, граѓаните имаат можност да закажат термин за сликање за лични документи преку termin.mvr.gov.mk или uslugi.gov.mk.