Елон Маск, новиот шеф на Твитер, вчера објави дека ќе го врати налогот на поранешниот американски претседател Доналд Трамп, забранет на социјалната мрежа по нападот на Капитол Хил во Вашингтон во јануари 2021 година.
Народот го кажа своето. Трамп ќе биде вратен, напиша Маск на својот профил на Твитер по резултатите од анкетата спроведена меѓу неговите претплатници, кои со големо мнозинство гласаа за враќање на републиканскиот политичар на Твитер.
The people have spoken.
Trump will be reinstated.
Vox Populi, Vox Dei. https://t.co/jmkhFuyfkv
— Elon Musk (@elonmusk) November 20, 2022
Нешто повеќе од 15 милиони корисници на Твитер гласаа во анкетата, а 51,8 отсто се изјаснија за негово враќање.
По објавата на Маск дека „народот го кажал своето“, на оваа социјална мрежа повторно се појави профилот на Трамп и на него се достапни старите објави на поранешниот американски претседател.
Претходно во текот на денот, Трамп не изгледаше премногу ентузијастички за враќањето на неговата некогаш омилена социјална мрежа.
Не гледам никаква причина за тоа, рече поранешниот претседател во видеото на прашањето дали планира да се врати на Твитер на панел на годишниот лидерски состанок на Републиканската партија.
Тој истакна дека ќе се придржува до својата нова платформа Truth Social, апликација развиена од неговата старт-ап компанија Trump Media & Technology Group (TMTG), за која рече дека има подобар ангажман на корисниците од Твитер и дека работи „феноменално добро“.
Трамп го пофали Маск и рече дека отсекогаш му се допаѓал. Но, тој исто така нагласи дека Твитер страда од ботови, лажни профили и дека проблемите со кои се соочува се „неверојатни“.
Во мај, Маск првпат изјави дека планира да ја поништи забраната за Трамп.