Општините од Југоисточна Македонија одбиле да го потпишат договорот со австриската фирма АСА Интернешнл која уште пред речиси три години го добила тендерот за концесија за управување со отпадот и изградба на депонијата. Оваа вест денеска преку писмено соопштение ја соопшти партијата ДОМ во кое се вели дека „ова се случува по тригодишен транспарентен процес на преговори помеѓу 10 општини, неколку министерства и понудувачот избран на меѓународен оглас“.
-Ова покажува дека управувањето со отпад во земјава е жртва на локални игри и интереси. Ако им била потребна владина поддршка за решавање на старите диви депонии, за да дојдат до пониска цена за ѓубрарина, требало тоа да го кажат на почетокот и да издејствуваат грантови кои постојат за таа намена, а не да го пролонгираат процесот во стилот сакам-неќам, се вели во реакцијата на ДОМ.
Претседателката на ДОМ Лилјана Поповска за НОВА вели дека е крајно разочарана од овој потег.
-Не е само Југоисточна Македонија, ова се случува и во Полошкиот регион и во општина Сара. Жално е да градиме имиџ на валкана земја која не може да се справи со отпадот. Трета година инвеститорот не може да потпише договор на транспарентно и легално добиен тендер, а последиците освен еколошки можат да значат и меѓународна тужба за Македонија, вели Поповска за НОВА.
Аса Интернешнл извиси и за Дрисла
Компанијата АСА Интернешнл се натпреваруваше и на тендерот за концесијата над скопската депонија „Дрисла“. Нивната понуда помина во првата фаза, но не и во втората кога тие беа дискфалификувани. На тендерот победи италијанскиот конзорциум, а второрангираната германска компанија „Шолц“ веќе ја тужи општината Скопје за нерегуларности во тендерската постапка. НОВА за овој скандал пишуваше повеќе од една година, а извори во австриската компанија со кои НОВА разговараше тогаше велеа дека се воздржале од жалби за постапката за „Дрисла“ бидејќи стравувале дека тој потег може да им го загрози договорот за регионалната депонија на Југоистокот.
Под регионалната депонија требаше да влезат општините Гевгелија, Богданци, Дојран, Валандово, Струмица, Радовиш, Конче, Ново Село, Василево и Босилево, а таа треба да биде лоцирана во василевското село Добрашинци.