25 од 130 најважни европски банки не го минаа стрес-тестот на Европската централна банка. Резултатот ЕЦБ денеска го објави во Франкфурт, пишува Дојче Веле на македонски јазик
Контролорите утврдија дека 25-те банки од еврозоната, кои не го минаа тестот, имаат потреба од капитал за одговор на кризи, кој се проценува на вкупно 25 милијарди евра. Ова го соопшти Европската централна банка (ЕЦБ) денеска во Франкфурт.
13 банки мораат да го пополнат недостигот на средства, додека 12 банки веќе го сториле тоа и ги зајакнале совите биланси за 15 милијарди евра. Останатите 13 финансиски институти имаат време од две недели, да поднесат план до Европската централна банка, како мислат да го пополнат недостигот на капитал. Потоа ќе имаат време од шест до девет месеци да го реализираат планот.
Стрес-тестот не го минаа девет италијански банки, три грчки, три кипарски, две словенечки, две белгиски и по една банка од Германија, Ирска, Австрија, Португалија, Франција и Шпанија.
Овој стрес-тест се спроведуваше во текот на 12 месеци од страна на Европската централна банка (ЕЦБ) и Европската агенција за надзор на банки (ЕБА). Европската централна банка во изминатите месеци тестираше 130 банки, меѓу нив 24 банки од Германија. Европската агенција за надзор на банките (ЕБА) проверуваше пак и банки во државите кои не се дел од еврозоната. Сите банки вон еврозоната, кои учествуваа во стрес-тестот, го минаа истиот.
На пример важниот банкарски пазар во Велика Британија, но, исто така и банки во Данска, Шведска, Норвешка, Унгарија и Полска во случај на финансиска криза би имале доволно сопствен капитал, соопшти ЕБА денеска во Лондон.