Ситуацијата во регионот, влијанието на руската агресивна војна во Украина и тековната поддршка на Германија за перспективите на земјата за пристапување во ЕУ, ќе бидат темите во фокусот на дводневната посета на претседателот на Сојузна Република Германија Франк-Валтер Штајнмајер на Република Северна Македонија која почнува денеска. Ова е прва посета на Штајнмајер на Македонија, по која заминува во соседна Албанија со што дава поддршка на заедничките регионални перспективи за интеграција во Унијата.
Германскиот претседател, според неговата агенда, се очекува денеска напладне да има средба со Претседателот Стево Пендаровски, по што во 13 и 15 часот ќе имаат заедничка прес-конференција. Во 14 часот ќе се обрати во Собранието, а во 16 и 15 часот ќе се сретне со премиерот Димитар Ковачевски во Влада.
На 30 ноември, Штајнмаер во Чифте амам ќе се сретне со филмската екипа на филмот „Медена земја“. Во попладневните часови ќе ги посети ветерниот парк во Богданци, а потоа германската компанија Дрекселмајер во Кавадарци.
Како што веќе објави НоваТВ во подетален текст, 67-годишниот германски претседател се смета за политички тешкаш, прагматичен во коалициско кохабитирање – искуство што го стекна како шеф на дипломатијата на канцеларката Ангела Меркел, во два наврати од 2005-2009 и од 2013-2017.
Иако припаѓаа на две спротивставени политички опции, Штајнмаер од социјал-демократите а Меркел од демохристијаните, тие успешно соработуваа заеднички примајќи ги ударите од Брегзит и руското анектирање на Крим во време кога Германија работеше напорно да го издигне својот профил на европската и светската сцена.