Српската листа објави дека именувањето на Ненад Рашиќ за министер за заедници и неговото враќање во владата во Приштина без согласност на српските пратеници е „неуставна одлука“ и „е најдобар пример за автократскиот“ косовски премиер Албин Курти.
Како што е најавено во соопштението, пратениците на Српската листа „против овој очигледен диктаторски потег на Албин Курти“ ќе поднесат жалба до Уставниот суд на Косово, „кој без никакво одлагање ќе треба да потврди дека се работи за кршење на Уставот и кршење на правата на српскиот народ“.
„По континуираното кршење на Бриселскиот договор, Албин Курти уште еднаш покажа дека не ги почитува ниту правните акти на Приштина доколку тие се во интерес на српскиот народ. Поточно, Албин Курти со ова назначување го прекрши членот 96, став пет од Уставот, во кој се вели дека за именување министер од редот на српскиот народ, кој не е пратеник, мора да се бара согласност од мнозинството српски пратеници, што не го направи Албин Курти, ниту пак Рашиќ ја има поддршката од нашите пратеници“, се наведува во соопштението.
Министрите и пратениците на Српската листа поднесоа оставки на почетокот на ноември како знак на несогласување со одлуките на владата на Курти за пререгистрација на возилата со српски таблички.
Извор: Н1