„Законот за индустриски емисии е во финална фаза и наскоро ќе влезе во постапка за донесување. Една од работите која е предвидена во овој закон е 24 часовен мониторинг за индустриските капацитети со А интегрирана дозвола“ изјави државната секретарка во Министерството за животна средина и просторно планирање, Каја Шукова во „24 анализа“ на ТВ24.
Таа додаде дека законот се работел подолго од што било планирано, бидејќи како Министерство наишле на отпор.
„Кога носите ново законско решение и кога дел од европското законодавство се става во македонското има отпор. Бизниз заедницата ќе биде запознаена со законот и за влијанието кое овој закон го има“ кажа Шукова.
Државната секретарка додаде дека македонското законодавство редовно ги следи најдобрите европски практики за заштита на животната средина и кажа дека последните години повеќе се носат и имплементираат програми и мерки за заштита на квалитетот на воздухот.
„Како што се зголемува свеста за загаденоста на воздухот кај граѓаните, се зголемува и кај властите“ рече Шукова.
Со промената на власта во Град Скопје замре работата на Законот за комунална полиција
„Законот за комунална полиција треба изворно да дојде од локалната самоуправа. Постои нацрт-верзија на законот, а последна е комуникацијата со ексградоначалникот Петре Шилегов, кој се потруди да се направи овој закон“ изјави Каја Шукова.
Таа додаде дека овој закон мора да излезе изворно од локалната самоуправа, бидејќи токму општините се тие кои ќе треба да го спроведуваат.
„Во овој случај иницијативата беше покрената од Град Скопје, како еден од најзагадените градови во државата. Тие го контактираа Министерството, се разговараше за законот, но откако се промени власта запре комуникацијата“ рече Шукова.
Државната секретарка кажа дека не може централната власт да организира се, бидејќи локалната самоуправа си има своја организација и откри дека комуникацијата на Минситерството со одредени општини тешко се воспоставува.