Денеска се навршуваат 20 години од смртта на Милан Младеновиќ, фронтменот на култната белградска рок-група „Екатарина Велика“.
Иако живееше само 36 години, легендарниот музичар и ЕКВ оставија неизбришливи траги во рок музиката на поранешните ЈУ простори.
Милан Младеновиќ е роден 21 септември 1958 година во Загреб, каде што живеел се до тргнувањето во основно училиште.
Неговиот татко бил офицер на ЈНА од Крушевац, а мајката домаќинка од Макарска. Потоа се сели во Сараево за кое вели дека „мрачно влијаело на него“.
– Бев страшно ратоборен, вистинољубив, малечок и постојано се тепав со постари од себе. Тие се разбира ме претепуваа и така доаѓав дома крвав и тоа траеше 6-7 години додека живеев таму.
Бев клинец со очила и носев танго гитара под пазуви. Посетував часови кај познатиот Гари Гаринча. Од него научив неколку акорди. Потоа се преселив во Белград (1970) и постојано свирев и правев песнички, а потоа кога го запознав Гаги се формира „Лимуново дрво“, велеше за себе Милан.
Во оваа прва група основачи покрај Милан Младеновиќ беа и Маргита Стефановиќ и Драгомир Гаги Михајловиќ. Подоцна им се придружуваат Горан Ковинчиќ и Душан Вдовиќ – Вд. Јадрото на ЕКВ го сочинуваа Милан Младеновиќ, клавир и придружен вокал Маргита Стефановиќ и басистот Бојан Печар, подоцна им се придружува Срѓан Тодоровиќ- Жиле, за низ текот на годините да се менува поставата.