После три месеци од отворањето Центарот работи во несоодветни услови. Во моментот просторијата наменета за децата, како и кујната се затоплуваат со клима уреди, а во дневниот престој нема кревети, велат волонтерите во Центарот.
Од таму велат оти им било кажано дека во Центарот децата нема да може во иднина да бидат згрижени до 16 часот, како што функционираат останатите центри низ државата. Во моментот истиот работи од 09 до 13 часот.
„Единствено ние овде во Центарот во Струмица сме волонтери, за разлика од останатите центри во државата. Немаме никакво решение за работа и сме со договор на дело до крајот на годината. После тоа не знаеме што ќе биде“, изјави за НОВА волонтер од Центарот.
Просторија во дневниот центар во Струмица
Во моментот престојуваат пет деца со посебни потреби. Наместо бројот на корисниците на услугите да се зголемува, како што беше најавено на отворањето од страна на директорот на Меѓуопштинскиот центар за социјални работи Кирил Поп Трајков, дека во Центарот ќе можат да бидат згрижени 15 деца, нивниот број се намалува.
Денеска децата со аутизам не престојуваат поради, како што велат нивните родители, немањето на медицинско лице и превоз.
Поп Трајков на отворањето изјави и дека ќе биде вработено медицинско лице, како и дефектолог и логопед. До денес такви вработени се уште нема, а социјален работник, психолог и социолог доаѓаат по потреба.
Но и покрај фактичката состојба, во телефонски разговор рече дека Центарот функционира без проблеми.
Дневен центар за деца со посебни потреби во Радовиш
За разлика од Струмица, во дневниот Центар во Берово вработени се седум лица, додека во Радовиш престојуваат 12 деца за кои се грижи вработен дефектолог.
Од Центарот во Радовиш велат дека секојдневно децата имаат некакви активности и самите си подготвуваат јадење во кујната.
Родител на дете кој престојува во Центарот во Струмица, за НОВА вели дека повеќе нема да го пушта своето дете доколку и понатаму просторијата во која престојуваат децата се затоплува со клима уред.
Дневен центар за деца со посебни потреби во Радовиш
Инаку, родителите на децата со посебни потреби додаваат дека во струмичкиот регион е многу поголем бројот на деца кои имаат потреба да одат во дневен центар кој ќе работи од 09 до 16 часот, како и останатите низ државата.