Владата на Република Македонија на вчерашната седница го прифати барањето на земјоделските индустриски производители за намалување на увозните давачки за индустриска пиперка и доматно пире.
Како што информираше владиниот портпарол, Александар Ѓорѓиев, квотата за извоз на индустриска пиперка изнесува 2.000 тони, а еден увозник смее да земе ¼ од предвиденото, односно 500 тони.
– Оваа одлука е донесена како резултат на консултација со земјоделските индустриски производители кои имаат потреба од овие производи во своето производство, и со домашните производители на овие производи, со цел да се донесе одлука која ќе биде во корист и на двете категории на земјоделски стопанства, односно да се придонесе и за земјоделските индустриски производители да се задоволат нивните потреби, но истовремено да не се наштети на производството и пласманот на овие производи кои се произведуваат од домашни производители, изјави Ѓорѓиев.
Земјоделските индустриски производители досега плаќаа 50 отсто од овие давачки, а сега ќе плаќаат нула. Одлуката важи до крајот на оваа година.
Втората одлука е намалување на царинската стапка за увоз на доматно пире. Оваа владина одлука ќе важи до 30.06.2015 година.
Еден увозник може да внесе 125 тони, што е ¼ од вкупно предвидените 500 тони.
– Со оваа одлука, според информациите кои ни беа доставени, нема да се наштети на домашните производители на пиперка затоа што анализите покажаа дека огромен дел од количините кои се произведени од домашни производители се веќе пласирани, и остануваат за пласман уште околу 1000 тони од овој производ. Исто така, бевме информирани дека нема да се наштети ни на домашните производители на доматното пире, затоа што заради негативни климатски ефекти се очекува намалување на домашното производство на овој производ, рече владиниот портпарол.
За двете одлуки ќе важи принципот прв дојден, прв услужен.