Зградата во која што се наоѓа седиштето на телевизијата
Иако веќе подолг период на терен фигурираат како веќе постоечкиот канал ВТВ, внатре од телевизијата велат дека официјално во етер ќе зрачат како Телеканал А1. Телевизијата претходно зрачеше како локална, но сега добива концесија за регионална телевизија. Зошто настана таква промена и зошто ќе се користи овој добро познат бренд на македонската јавност токму во Струмица, не добивме одговор од главниот уредник Петар Трајков, кој и е добро познат на струмичката јавност како активист и член на ВМРО-ДПМНЕ.
Во телефонски разговор Трајков ни изјави дека ќе одговори на прашањата кои ги испративме до него, но до денеска одговор не добивме. НОВА, покрај неколкуте прашања, побара одговор и за тоа каква програма ќе и биде понудена на јавноста, со колкав тим ќе располага, колку средства се вложени и која е целта на телевизијата, но одговор не добивме.
Во јавноста деновиве се шпекулира дека телевизијата ќе биде наменета единствено како конкурент на политиките на струмичкиот градоначалник Зоран Заев.
Сопствениците на веќе постоечките телевизии во Струмица, ТВ Канал ВИС и ТВ Интел размислуваат различно во однос на отворањето на А1 струмичка. Едни во неа гледаат нелојална конкуренција, а други поттик за подобрување на програмата.
„Се надеваме на фер конкурентност, а очекуваме нефер конкурентни односи. Што можеме да очекуваме кога ВТВ телевизија во 2013 година само со еден вработен имаше 10,5 милиони денари приход, а сега преструктуирани ќе работат со над 20 вработени“, вели Димитар Мицев, сопственик на ТВ ВИС.
Тој вели дека телевизија ВИС во иднина на пазарот ќе се бори со содржина и добра програма, бидејќи во другиот дел, како што истакна, не можеле да бидат конкурентни.
Од телевизија Интел пак сметаат дека во медиумскиот простор има место за работа на повеќе ТВ станици и дека е нормално како комерцијални субјекти секој да се избори со својата програмска шема за што поголема публика, а со тоа и за поголем број на клиенти кои ќе се рекламираат.
„Конкуренцијата била присутна отсекогаш и таа треба да ни даде поттик и повод за што повеќе да го подобриме квалитетот на нашата програма, а со тоа и гледаноста. Би потенцирал дека секој медиум со својата програмска понуда достига одреден рејтинг како резултат на тоа колку гледачи успева да задржи на својата фреквенција пред ТВ приемникот“, вели Георге Запров, сопственик на ТВ Интел.
Новата регионална телевизија Телеканал А1 официјално требаше да стартува од 1-ви ноември, а во исто време се најавуваат уште шест нови регионални телевизии во државата.