Комисијата за утврдување на дисциплинска одговорност на јавен обвинител во вршење на јавнообвинителската функција при Јавното обвинителство на Република Северна Македонија, по спроведената дисциплинска постапка против три јавни обвинителки и разгледување на извештајот на обвинителот-известител, донесе Решение со кое за поранешна основна јавна обвинителка на Основното јавно обвинителство за гонење на организиран криминал и корупција е утврдено дека е одговорна за сторена тешка дисциплинска повреда на Законот за Јавното обвинителство и Комисијата одлучи да поднесе предлог за нејзино разрешување до Советот на јавните обвинители, соопшти денес Обвинителството.
Се додава и дека за една јавна обвинителка од Основното јавно обвинителство за гонење на организиран криминал и корупција, за утврдена тешка дисциплинска повреда е изречена дисциплинска мерка – намалување на месечна плата во висина од 30% од исплатената нето плата во траење од 6 месеци.
Третата обвинителка е ослободена од одговорност бидејќи не се докажало дека сторила тешка дисциплинска повреда.
Обвинителките ќе имаат право на жалба.
Да потсетиме дека станува збор за случајот претрес во Управата на финансиска полиција за кое се поведе дисциплинската постапка против Русковска и обвинителките Ивана Трајчева и Елизабета Јосифовска.