„Магија под месечевата светлина“ на режисерот Вуди Ален во кој главните улоги ги толкуваат Ема Стоун и Колин Фирт ќе се прикажува вечерва во кино Милениум како дел од филмскиот фестивал „Синедејс“ во 22:30.
Се работи за филм кој посети многу светски фестивали годинава патувајќи од Кан до Венеција, до Нов Зеланд, Бостон и други.
За филмот: Кинескиот магионичар Веи Линг Со е еден од најславните магионичари на своето време, но малкумина знаат дека тој всушност е Стенли Крафорд (Колин Фирт), еден намуртен и арогантен Англичанец. Убеден од страна на својот пријател, Хауард Буркан (Сајмон Мекбарнли), Стенли заминува на мисија на Азурниот Брег, во вилата на семејството Катлеџ, каде што се: мајката Грејс (Џеки Вивер), синот Брајс (Хејмиш Линклатер) и ќерката Керолин (Ерика Лирхсен). Се претставува како бизнисмен по име Стенли Таплингер, со цел да ја разоткрие заносната млада јасновитка Софи Бејкер (Ема Стоун), која престојува таму заедно со својата мајка (Марсија Геј Харден). Веднаш по пристигнувањето, Софи го привлекува вниманието на Брајс, кој силно се вљубува во неа. На крајот, најголемиот трик – „Магијата под месечевата светлина“ успева да нe прелаже сите нас.
Од селекцијата Гала Премиера во 17:30 во Милениум ќе се прикажува „Ида“ на Павел Павликовски. Филм кој освои многу награди во 2014 како за техничкиот дел, така и за актерската екипа.
За филмот: Полска, 1962 година. Ана е почетничка, сираче одгледано од калуѓерките во манастирот. Таа мора да оди да ја посети Ванда, единствената жива родина што ја има, пред да го даде својот завет. Ванда ѝ кажува на Ана дека е Еврејка. Двете жени започнуваат едно патување, не само за да ја откријат нивната трагична семејна приказна, туку и за да откријат вистината за себе и за тоа каде припаѓаат. И двете се сомневаат во своите религии и во идеите во кои веруваат. И двете се обидуваат да продолжат со животот, но само една од нив ќе успее во тоа.
Главните улоги ги толкуваат Агата Кулешча, Агата Трзебучовска и Давид Огродник.
Од филмовите на програмата Гала Премиера денеска во 20 часот ќе се прикажува турскиот „Рез“ на Фатих Акин, кој годинава беше дел и од фестивалите во Лондон, Хаифа, Хамбург и други.
Во рамките на СинеБалкан, во 19 часот во киното Фросина во МКЦ ќе се прикажува „Песната на мајка ми“ на Ерол Минтас кој освои две награди на Сараевскиот филмски фестивал 2014.
Литванскиот филм „Коцкарот“ на Игнас Јонинас во кино Фросина ќе се прикажува од 23 часот, додке од програмата за музички документарци, во истиот термин во Џебното кино на МКЦ ќе се прикажува „Време за импровизација“.