Во кино Милениум денеска на репертоар од програмата на „Синедејс“ филмскиот фестивал публиката со почеток во 17:30 часот ќе има можност да го погледне филмот на Мишел Гондри „Дали е среќен човекот што е висок“ во кој учествуваат самиот Мишел Гондри и Ноам Чомски.
Режисерот Мишел Гондри со помош на својата разиграна фантазија, создава повеќе анимирани разговори со познатиот лингвист, филозоф, политички говорник и активист – Ноам Чомски. Во средиштето на овие разговори е и теоријата на Чомски за потеклото на јазикот. Во оваа интелектуална гозба Гондри користи цртежи со чија помош подобро ги објаснува сложените идеи и ја проширува документарната форма.
Филмот учествуваше на повеќе филмски фестивали, меѓу кои во Берлин и Сиднеј.
Во 19 часот во кино Фросина МКЦ од Официјалната селекција на „Синедејс“ ќе се прикажува „Спомени во камен“ на Шавкат Амин Корки.
Програмата на кино Милениум ќе биде збогатена со проекција на филмот „Пченкарен остров“ на Џорџ Овашвили, филм кој на меѓународниот фестивал во Карлови Вари филмот ја доби наградата на Екуменското жири и Гран при – кристален глобус, а се закити и со Гранд при наградата на Сплитискиот филмски фестивал.
„Кажи како се викам“ на Нигина Сејфулаева, филм кој беше прикажуван на филмски фестивали и во Шпанија, и во Сенкт Петербург ќе се прикажува во киното Фросина во 21 часот.
Во 22:30 часот во кино Милениум од селекцијата Гала Премиера, на програмата е „Зимски сон“ на Нури Билге Цејлан, филм кој беше прикажуван на над 10 филмски фестивали годинава.
„Лауш“ на Бранка Бешевиќ Гајиќ на репертоар е во 23 часот во кино Фросина.
„Лауш“ е документарен филм снимен според вистински настани и разговори за животот на Жарко Лаушевиќ – еден од најпознатите актери во поранешна Југославија, но и жртва на тешките времиња во државата. Филмот ја претставува неговата судбина преку своите наративни делови, како и преку спомените на неговите колеги и пријатели, а исто така употребен е архивски материјал, како и цитати од неговиот роман „Годината минува, денот никогаш“, што Жарко го напишал за време на најтешкиот период во неговиот живот. „Лауш“ ни го прикажува животот на еден харизматичен актер со неверојатна кариера, кој исчезнува од сцената на врвот на својата слава како резултат на ароганцијата и на предавничките времиња во поранешна Југославија. Филмот се занимава со делото на Лаушевиќ, неговата уметност, страдањето и со „воскреснувањето“ како уметник. Проектот ги открива причините за неговото исчезнување од сцената. А под тоа се подразбираат политичките премрежја во 90-тите.
Од музичките документарни филмови, во 20 часот во Џебното кино ќе се прикажува „Тврда почва: Калливите корени на американската почва“ кој го прикажува минатото и развојот на американската рутс музика и го испитува нејзиното социјално и културолошко значење во 21 век.