Најдобра претстава оваа сезона во Хрватска е “Три сестри” на Антон Павлович Чехов во режија на маестро Слободан Унковски, изведба на Градскиот Драмски Театар Гавела од Загреб.
Во пресрет на прикажувањето на Чеховите „Три сестри“ во јануари оваа година, хрватските медиуми „Јутарњи“ како и политичкиот магазин „Актуал“, објавија интервјуа со славниот драмски режисер.
– Јас ја избрав актерската екипа. Бев во Загреб неколку пати по два-три дена и ги гледав претставите. Ги сретнав глумците, секој од нив посебно, ги гледав, разговарав со нив, мислев и така дојде до поделба на улогите, изјави Унковски во интервјуто за „Јутарњи“.
Македонскиот режисер вели Чехов за него е доста специфичен, а за прв пат го поставил пред речиси осум години во Скопје и Белград.
„Многу е скормен и бескрајно симпатичен. Многу е тешко во него да се препознае поранешен Министер за култура, угледен режисер и некогашен професор на Харвард“, пишува за него хрватски „Јутарњи“.
Во интервјуто за „Актуал“, режисерот Унковски објаснува како дошло до соработка со Хрватска.
– Откако директорот на „Гавела“, Дарко Стажиќ ми предложи да ја поставам претставата во овој театар, започнав разговори за насловите, и на крај одлучивме тоа да бидат „Трите сестри“. Таа претстава најмногу и одговара на моите моментални интереси и квалитетите на ансамблот на овој театар.
Воедно, во последно време театрите доста се занимаваат со политички обоени текстови, па сметам дека е добро да се вратиме на едноставните, но важни теми како што се љубовта и одминувањето на времето…текстот не го модернизирав намерно, туку го прилагодив и „преведив“ во денешно време. Беше тоа комплициран процес со оглед на тоа што станува збор за Чехов, кој покрај Шекспир и други врвни писатели, е потполно заокружен, би рекол дефинитивен, објаснува македонскиот драмски режисер.
Унковски има работено во САД, Германија, Русија, Словенија, Србија и Грција, меѓу другите земји и добитник е на голем број награди во странство и Македонија.