Македонските компании извезуваат храна од денеска ќе мора да ги почитуваат новите правила за јасно и прецизно означување на храната кои важат на пазарите во Европската унија.
Новите правила кои важат во земјите од ЕУ, налагаат буквите на декларацијата да бидат со големина од 1 до 2 милиметри, за корисниците да можат јасно да ги читаат, со што ќе добијат детални и точни информации за содржината на храната што ја купуваат. Покрај големината на буквите, на секоја декларација мора да биде означено дали содржи алергени, потоа потеклото на прехрамбените производи, нутритивните табели, отстапките во нето тежината и слично.
Последните измени на европските правила во делот на означувањето на производите се обврска за операторите за подигнување на нивото на информираност на потрошувачите.
Агенцијата за храна и ветеринарство во соработка со Стопанската комора на Македонија, Сојузот на стопански комори и Комората на северозападна Македонија, во текот на ноември и декември, организираше осум работилници преку кои ги информираше операторите со храна за новините во означувањето кои се наложуваат од ЕУ.
Предвидено е наскоро да биде донесен нов Правилник за означување кој детално ќе ја уреди оваа област откако претходно европските новини ќе бидат инкорпорирани во Законот за безбедност и храна.
Новите одредби од Законот кои се однесуваат на означувањето, за домашните производители ќе почнат да се применуваат од 01 јуни 2015 година.