Студиото „Сони“ се откажа од прикажување на филмот „Интервју“ чија премиера беше планирана на 25 декември, откако кино салите ширум САД, одлучија да не го прикажуваат поради безбедносни причини.
Станува збор за фиктивен заговор за убиство на севернокорејскиот лидер Ким Јонг-ун, кога двајца американски новинари заминуваат во Северна Кореја на интервју со Ким, но со договор од ЦИА треба да извршат атентат врз него.
Заканите за филмот да не се прикажува стигнаа од хакерски напади врз датотеката на „Сони Пикчерс“, кои ги предупредија гледачите да не одат во кино салите да го гледаат „Интервју“.
Филмската компанија „Сони“ изрази жалење за ваквиот развој на настаните и потенцираат дека и натаму стојат зад оваа продукција како и зад правото на слободно изразување.
Сепак „Аламо Драфтхаус“ не се откажува од Северна Кореја. Наместо „Интервју“ тие ќе ја прикажуваат сатирично-акционата комедија од 2004 година „Тимот Америка-Светска полиција“.
Филмот од 2004 година е анимиран, а во него е вклучена верзија од тогашниот лидер на Севернокорејците, Ким Јонг Ил како главен негативец.
– Сакаме само да го изведеме најдоброто од една несреќна ситуација, вели програмскиот менаџер Џејмс Валас.
Досега, Северна Кореја нема официјална реакција за „Тим Америка“, за разлика од „Интервју“ на „Сони“, кога реагираа гневно на ова филмско остварување.
Според властите во САД, хакерските напади над „Сони“ потекнуваат директно од Пјонгјанг.