Ликовните уметници Христина Ивановска и Јане Чаловски се годинашни македонски претставници на Венециското биенале. Нивниот проект „Ние сите сме сами во ова“ го предложила Националната галерија на Македонија. Куратори ќе бидат Башак Шенова од Турција и Маја Чанкуловска-Михајловска.
Проектот е пред се истражувачки и создаван во повеќе етапи, и произлегува од силен интерес кон идејата за реактивирање, или пак реанимирање, на нови релации кои произлегуваат од реконтекстуализирање на сликарското дело на анонимниот автор од црквата од XII век „Свети Ѓорѓи“ од Курбиново (видена како предзнак за идејата на истражувачки центар) во дијалог со современите концепти за истражувачка, концептуална и концепт-базирана уметност.
Станува збор за инсталација со три ѕида на кои архитектонски и математички е отсликана димензијата на црквата „Свети Ѓорѓи” (од 12. век) во Курбиново, во размер 1:2. Преку ова свое дело, двајцата уметници се занимаваат со вербата како емотивна и интелектуална состојба, но и како своевидна социо-патолошка аномалија.
Трите ѕида на инсталацијата кореспондираат со јужниот, источниот и северниот ѕид на црквата „Свети Ѓорѓи“, а западниот е изоставен – го симболизира влезот. На нив се наоѓа првото дело – минималистички ѕиден цртеж кој го отсликува фрескописот во црквата, изведен во современа технологија, но согласно стариот начин на цртање, со малтерна основа и апликација на пигмент. Во ѕидниот цртеж потоа, се инкорпорирани поединечни дела на Иваноска и Чаловски во вид на текст цртежи, хартиени конструкции и објекти.