Официјалните лица на САД потврдуваат дека американските служби поседуваат информации кои ја потврдуваат одговорноста на Исламска држава за смртоносниот терористички напад на концерт во сала во близина на Москва. Истиот извор, пренесуваат повееќе западни новински агенции, нагласил дека во последните недели САД ја предупредиле Русија за можноста од овој тип напад.
Претходно овој месец, американската влада имаше информации за планиран терористички напад во Москва кој би можел да има за цел големи собири, вклучително и концерти, што го натера Стејт департментот да издаде јавно предупредување до Американците во Русија, изјавиа портпаролката на Советот за националната безбедност на Белата куќа, Адриен Вотсон.
Американската влада, исто така, ја сподели оваа информација со руските власти во согласност со нејзината долгогодишна политика „должноста да се предупредува“, рекла таа.
Во петокот кога маскирани вооружени лица отворија оган со автоматско оружје врз посетителите на концертот во близина на Москва во еден од најсмртоносните напади во Русија во последните децении, беа убиени повеќе од 60 луѓе, а 145 се ранети .
Исламската држава, милитантна група која некогаш презеде контрола над делови од Ирак и Сирија, ја презеде одговорноста за нападот.
Американската амбасада во Русија на 8-ми март предупреди дека „екстремистите“ имаат непосредни планови за напад на Москва, неколку часа откако руските безбедносни служби соопштија дека спречиле планиран напад на ќелија на Исламската држава врз синагога.