Во рамки на 36. издание на Саемот на книга, во сабота, 20 април, во арената „Борис Трајковски“ во Скопје на штандот на издавачката куќа „Антолог“ специјален гостин ќе биде шведскиот новинар и писател Андерс Рослунд.
Рослунд е познат по своите крими трилери и освојувањето на многу награди, но и по позиционираноста на водечки места на бестселер-листатата на „Њујорк тајмс“. Тој е автор на книгите „Чук чук”, „Слатко сонувај“ и „Верувај ми“, која ќе има специјална промоција во рамки на Саемот на книга, три дела кои веќе се преведени на македонски,како и на други наслови зад кои се потпишува во дуо.
-Рослунд е еден од најистакнатите автори на криминалистичка проза во моментов, со богата кариера и со голем број на обожаватели низ светот. Неговите трилери се познати по својата напнатост и интрига, и сигурни сме дека ќе биде неповторливо искуство за сите присутни на настанот да имаат можност да го сретнат и разговараат одлблизу со него, потенцираат од „Антолог“.
Рослунд (1961) досега има објавено десет книги како дел од писателските дуети Рослунд и Хелстром и Рослунд и Тунберг. Пишува и под псевдонимот Антон Свенсон. Бил основач на „Вести од културата“ на Шведската национална телевизија, а работел и како новинар во црна хроника. Неговите дела се преведени на 31 јазик и продадени во три милиони примероци.
Годинашниот Саем на книга ќе се одржува од 18 до 24 април, под слоганот „Приказна се чита“.