Во единственото средно училиште во Струмица „Димитар Влахов“, каде што не се извршува екстерно тестирање вчера имало силни закани и притисоци.
Во 13 часот попладне, по телефон и по итна партиска наредба биле повикани 20-тина ученици да дојдат во училиштето со цел да се изврши екстерно тестирање, пишува во реакцијата на училиштето.
Бидејќи професорите во СОУ „Димитар Влахов“ штрајкуваат, главни актери биле наставници од други училишта со сомнителна стручна спрема назначени од страна на МОН, велат наставниците.
Тие додаваат дека тестаторите биле пуштени под закана, сe со цел тестирањето да се спроведе по секоја цена.
„Учениците беа уредно известени и беа во просториите точно навреме во 9 часот, но исто како претходниот ден, испитот не почна, бидејќи членовите на испитната комисија се во штрајк. Под итна постапка беше формирана испитна комисија во неполн состав, а од страна на партиски кругови, учениците беа повикани по телефон да се вратат во просториите на училиштето. Од вкупно 300 ученици, во 13 часот дојдоа само 20-тина и истите беа екстерно тестирани. Ваквиот преседан беше направен со цел да се каже дека, еве и во СОУ „Димитар Влахов“, единственото училиште во кое не почна екстерното тестирање, бидејќи вработените се во штрајк, истото е спроведено. Воопшто не се водеше сметка за исправноста на постапката, многу поважно беше до МОН да стигне информација дека тестирањето „УСПЕШНО” се спроведува“, стои во реакцијата.
За апсурдот да биде поголем, на професорите кои штрајкуваат не им било дозволено да излегуваат од просторијата за штрајкување, дури ниту да ги извршуваат физиолошките потреби, за да не го попречуваат процесот на тестирање.
„Едноставно вработените се чувствуваа како заложници на сопственото работно место. Исто така има информации и дека во текот на тестирањето на учениците им било дозволено да користат литература и мобилни телефони за да препишуваат, како би добиле поголеми оценки се со цел професорите да бидат казнети“, стои во реакцијата.
Наставниците од СОУ Димитар Влахов велат дека ваквите постапки никому не одат во прилог, а посебно не на учениците. Најавуваат дека резултатите од екстерното тестирање нема да ги прифатат и ќе поднесат приговор до ДИЦ.