ДРАГАН МИШЕВ / ЦИВИЛ МЕДИА
Уште не седната на претседателската фотеља, со првите реченици изговорени во својство на новата функција, новата претседателка на Република Северна Македонија предложена од ВМРО – ДПМНЕ, веќе предизвика дипломатски и меѓународен скандал, кој секако ќе има далекусежни последици по евроинтеграциите на земјава.
Имено, при давањето на претседателската заклетва, Силјановска – Давкова избегна целосно да го повтори текстот од заклетвата кој го читаше собранискиот спикер, туку државата со која ќе претседателствува во наредните 5 години, наместо со новото уставно име, ја нарече само Македонија, што доведе до тоа грчката амбасада да ја напушти собраниската сала во знак на протест.
И колку и да се трудат „експертите“ од вмровска провиниенција да ја оправдаат со неизменетото уставно име во изборниот законик, според кој се чита заклетвата, каде се уште стои Република Македонија, таа не го изусти зборот Република, туку со изјавата се самопрогласи за претседателка на целиот географски регион Македонија, во кој покрај делот во Северна Македонија, спаѓаат и Пиринскиот и Егејскиот дел, кои се наоѓаат на териториите на соседните држави, Бугарија и Грција, што претставува иредентистички чин кој наговестува територијални претензии на претседателката.
Ваквиот чин секако не треба да изненадува никого, новата претседателка само ја спроведува на дело предизборната реторика дека нема да ја користи придавката „Северна“, исто како што во продолжението на инаугуративното обраќање огромно внимание му посвети на партискиот лидер Мицкоски, кој го спомна неколку пати, повторно во духот на сервилноста кон неговиот „лик и дело“ што ја покажа кога во пресрет на вториот круг од претседателските избори изјави:
„Не очекувајте јавно да му се спротивставам на господинот Мицкоски. Тој е лидер на политичка партија.“
За крајот на обраќањето да го посвети на жените, избегнувајќи да каже ниту збор за плановите за иднината на земјата и нејзините евроатлантските интеграции за време на нејзиниот мандат, што и не зачудува ако се земе предвид нејзиното опкружување, со кое на социјалните мрежи кружи фотографија направена во претседателскиот кабинет, и во кое спаѓаат неколку докажани противници и кочничари на НАТО и ЕУ интегративните процеси на земјава ( за кои се шпекулира дека ќе бидат советници во нејзиниот кабинет), и, што е уште поскандалозно, на сликата е и човекот кој во својство на одговорен уредник на една телевизија, се закануваше дека ќе летаат глави и ќе бидат убивани по улица политичките неистомисленици и нивните семејства.