(ФОТОГАЛЕРИЈА) Населени места во струмичко претворени во езера

Синоќешните дождови поплавија неколку населени места во струмичкиот регион. Најкритично е во селата Муртино, Просениково и Дабиле, кои се и најниските населени места. Жителите на Муртино кои од рано изутрина се излезени да ги спасуваат своите домови од надојдените дождови, велат дека многу малку фали водата од реката да се излее и да го зафати целото село. Заедно со нив на терен со механизација се излезени и од Кризниот штаб при општина Струмица.

„ Полето е целосно уништено, денеска овде сме собрани за да спасиме водата да не го поплави целото село. Дојдена е една механизација од општината, но има неколку критични места. Ние сме овде земјоделски крај, полето ни е направено како езеро, ќе нема ништо од производството“, велат разочараните жители.

Според револтираните жители ваквата состојба веќе е доцна да се санира, бидејќи како што изјавија, речните корита требало да се чистат кога земјата е сува. Денеска тие заедно со екипи на ЈПКД „Комуналец“ и Противпожарната единица, со вреќи песок се обидуваат да спречат излевање на реката, на само 500 метри од селото.

Командантот на Општинскиот штаб за заштита и спасување, Кирил Парталов, кој ја следи состојбата на лице место, рече дека ова е критична точка од каде може да се поплави цело село Муртино. Најавата за нови врнежи од дожд ја прави ситуацијата неизвесна.

Во селото Дабиле по синоќешните дождови повторно се поплавени неколку домови, кои се најблиску до самата река. Сопствениците велат дека ова им се случува секогаш кога има поголеми врнежи.

На терен денеска се и екипи од водостопанство Струмичко поле. Од таму велат дека ситуацијата е лоша и дека во текот на денешниот ден може да биде се покритична.

„ Најмногу вода по реката Струмица надоаѓа од радовишките реки и тоа прави најголем проблем. Како оди работата ќе бидеме принудени да испушиме вода од акумулацијата „Турија“, вели Ѓорги Нацев, од Струмичко поле.

Од водостопанското претпријатие изјавија дека утрово поплави се забележени и во последните населени места кон границата со Република Бугарија.