Од седиштето на Советот на Европа во Стразбург денес пристигна вест дека претседателот на Европската народна партија, сестринска партија на ВМРO-ДПМНE, Педро Аграмунт, шпански пратеник, испратил соопштение со поддршка до владеачката партија.
Соопштението на Аграмунт изразува загриженост за обидот за недемократското преземање на власта и неодговорното однесување на политичката опозиција.
Овој шпански демохристијанин е известувач за Азербејџан во Парламентарното собрание на Советот на Европа (ПССЕ) во Стразбург. Но, неговите извештаи за политичките затвореници во Азербејџан се предмет на значајна контроверза во Советот на Европа.
Организациите за човекови права како Хјуман Рајтс Воч ја критикуваат неговата блискост со режимот во Азербејџан и сметаат дека Шпанецот не направил ништо за да фрли светлина врз бројните нарушувања на човековите права во оваа азиска земја.
Европската иницијатива за стабилност минатата година бараше оставка од Аграмунт тврдејќи дека тој систематски ги покривал нарушувањата на човековите права во Азербејџан.
«Подобро би било за Педро Аграмунт да даде оставка од својата позиција во ПССЕ како известувач за Азербејџан отколку да остане на оваа позиција во 2015 година. Овој чекор би им дозволил на набљудувачите на Советот на Европа да продолжат да играат значајна улога во Азербејџан. На оваа земја и е потребно кредибилно набљудување повеќе од кога и да е досега», вели ЕСИ во еден свој текст за Аграмунт.
Инаку, Европската народна партија во Европската унија се уште не реагираше на настаните во Македонија. Наместо нив, со соопштение се јави словачкиот претеник од оваа партија Едвард Кукан кој рече дека “напнатите односи помеѓу владеачката партија и опозицијата добија ново свртување кон полошо кога лидерот на опозицијата Зоран Заев беше обвинет дека го нарушува уставниот поредок”.
Пратеникот побара од ВМРО-ДПМНЕ, кој и е партнер на Европската народна партија, да “ги почитува демократските принципи како што е јасната разделеност помеѓу партијата и државата и независноста на судството кои треба на транспарентен начин да превземат политички сензитивна истрага”.