Иако водата се повлекува од обработливото земјиште и населените места во струмичкиот регион, дел од општините кои беа зафатени од поплавите се уште немаат извршено проценки за настанатите штети.
Сликата во неколку куќи низ местата кои беа поплавени се уште е катастрофална. Пониските места и подрумите се целосно уништени, а обработливите површини сега се полни со кал откако водата се повлекува. Земјоделците велат оваа година е загубена. Се прашуваат како ќе опстанат кога нема да можат да ги посадат земјоделските култури. Тие пак што ги имаат посадено, се целосно уништени и се под вода. Велат, штетите за кои допрва ќе се утврдува откако ќе се направат проценките од страна на комисиите, ќе бидат огромни.
Во струмичко неколку села беа целосно под вода за време на поплавите. Најмногу на своја кожа тоа го почувствуваа жителите на Муртино, Моноспитово, Бориево, Зубово, Дабиле и Просениково. Се до денеска не се знае колку хектари земјиште зафатија поплавите во струмичкиот регион. Единствено што можеше да се утврди на терен беше сликата од населените места кои повеќе наликуваа на мали езера.
.jpg)
„ Расадот ни беше подготвен за сеидба, но се е под вода и не можеме да го засадиме, му поминува вегетацијата, а трошоците се големи, штетите се огромни. До сега никој од надлежните не дојде да види каква е состојбата, а се е под вода и кал“, вели Асенчо Стаменов од село Бориево.
„ Главниот проблем беше реката Струма која не е исчистена многу одамна, го кине трапот и влегува вода дури во селото. Трипати се обидувавме да ја градиме реката иако не е наша работа, изјави Ристо Јарков земјоделец од село Бориево.
Земјоделците велат дека сега е потребно што побргу да се направат проценките од штетите и да им бидат исплатени средства за да можат да опстанат.
Од општина Босилово изјавија дека е утврдена општинска комисија која е на терен и врши проценка од поплавените површини и домови.
„ Во моментот се работи на терен, до нас има пристигнато околу 40 барања за поплавени домови, а за обработлива површина се уште нема. Проценката ќе се утврдува според методологијата од 2001 година и не знаеме кога ќе заврши, вели градоначалникот на Босилово, Љупчо Колев.
Од општина Струмица потврдија дека проценката за утврдување на штетите е речиси во целост завршена. Членовите на комисијата извршиле увид по вкупно 471 барање, од кои 37 во Дабиле, 74 во Просениково, 86 во Сачево и 262 во Муртино.
„Од овие барања 40 се за поплавени куќи или помошни простории, а останатите за обработливо земјоделско земјиште во атарите на овие населени места. Барање за проценка на штети поднеле и 12 правни лица“, велат од општина Струмица.
Од таму додаваат дека следува обработката на податоците и изработка на поединечни пресметки за секој подносител на барањето и изработка на извештај за вкупните штети од поплавите, кој откако ќе биде усвоен од Советот на општина Струмица, ќе биде доставен до второстепената владина комисија.
Штетите од поплавите ќе значат пролонгирање на садење на градинарските култури, што во исто време значи и пролонгирање на приходите, велат агрономите.
„ Направени се големи штети, кои директно ќе се одразат на редуцирање на културите или уништување целосно на некои поседи, како житните и градинарските култури, вели агрономот Душан Спасов.
Според него, не може да се каже во овој момент дали ќе имаме и ценовни шокови бидејќи не се направени проценките , но тоа што е сигурно е дека не може да се запазат некои рокови кои биле планирани за извоз, а тоа значи дека пазарите нема да бидат задоволени со одредени земјоделските култури.
Од Синдикатот на земјоделците во Струмица го обвинија министерот за земјоделство заради, како што велат, неизлегување на терен да ја увиди состојбата.
„Половина од обработливото земјиште во Македонија е поплавено, а министерот за земјоделство како да не е од оваа планета, обвинуваат од синдикатот.
Тие го повикаа министерот Цветков да излезе на терен и да им се помогне на земјоделците во овие тешки денови.
„ Земјоделството пропаѓа по сите гранки, овие поплави уште повеќе ќе ги намалат приходите на земјоделците, а вас ве нема на терен. Затоа сакаме да ве прашаме, ако се уништи земјоделството во Македонија, на кого ќе бидете министер вие?, рече Ристо Велков, претседател на Синдикатот на земјоделци во струмичкиот регион.
Земјоделците побараа и исплата на субвенциите, проценка на штетите и исплата во најкус можен рок, како и програма за чистење на каналите и одводнување на нивите.
Одговор добија не од ресорниот министер, туку од министерот за транспорт и врски Миле Јанакиевски, кој вети дека ќе се исплатат субвенциите на лозарите. Веќе вчера преку соопштение беше кажано дека лозарите се исплатени.
На сметките на 13.767 лозари се префрлени 396 милиони денари. Владата на лозарите им исплати по 40.000 денари по хектар за одржување лозови насади. Со исплатата целосно се завршени обврските за субвенции по оваа мерка.