Владата го официјализира барањето за разрешување на државниот обвинител Коцевски. Неговото постапување било незаконско, го нарушил угледот на јавното обвинителство, а како што велат, и неговата фунцкионалност. Предлогот за разрешување треба да го подготви министерството за правда, а според владата, во него ќе биде уште наведено дека во обвинителството има корупција, неефикасност и влијанија. Тоа биле силни аргументи за разрешување на Коцевски.
Државниот обвинител пак смета дека не постојат причини да замине од позицијата. Пред владата да го официјализира барањето за разрешување, изјави дека ги почитува законите, а доколку се утврди дека ги прекршил, спремен е да ја напушти функцијата. Дали предлогот за разрешување го гледа како политичка смена, конкретно не одговори.
Одлуката ја оставам на политичарите. Јас строго сум работел и се уште ќе работам согласно законот. Условите доколку се исполенети согласно законот за јавно обвинителство, стојам на тоа и нека ме разрешат. Меѓутоа, доколку не се исполнети условите согласно законот за јавно обвинителство јавноста ќе цени дали ќе бидам разрешен на законит или на незаконит начин, изјави Љупчо Коцевски, Јавен обвинител.
Предлогот за разрешување на Коцевски ќе го разгледува и Советот на обвинители. Дава позитивно или негативно мислење кое го испраќа до владата. Постапката продолжува во собранието, каде се потребни 61 пратенички глас за разрешување на државен обвинител.