Зоран Иванов
Не е до домашното воспитување на министерката за финансии.
Сигурно е дека убаво си ги воспитува и своите два сина иако од собраниската говорница, понесена од партиската позиција на моќ, очигледно и од актуелната доминантна државна функција, со својата непримерна ароганција на народна слугина, а како мајка воспитувач, веројатно и на децата им остави лош впечаток.
Па сепак, некако и донекаде малку од малку го поправи тоа со нејзината жртва за семејниот ручек на кој на менито наместо поскапиот грашок во конзерва, како солидарна жртва со се` понискиот стандард на граѓаните, на семејството му принесувала од поевтиниот, од замрзнат грашок.
И така некако, покриена со својот функционерски имунитет, објаснуваше од собраниската говорница на пратеничките прашања за цените и за домашната кошничка со неопходните намирници на темата за тоа како да се преживее во оваа актуелна македонска сиромаштија.
Се засегна младата жена министерка за грашокот замрзнат на сметка на конзервираниот. Ете не и` стасувале и тие плус 78% за конзервиран па принудно компензирала со замрзнат зеленчук.
Нејсе, тежок живот министерски.
Туку, за навредата кон колешката пратеничка и жена, многумина веќе кажаа доволно и тука нема што многу да се додава или одзема.
Комплекси вредносни.
Плус, карактер.
И не е до статусот актуелен, ниту до домашното воспитување за навредите.
Ниту до грижата мајчинска. За тоа најмалку.
Туку, докажано искуствено, до доктрината партиска е.
До ароганцијата партиска. До културната матрица на ВМРО-ДПМНЕ е.
Проверете на реактивните коментари за осудата на јавноста. На онаа домаќинска и непартиска. Видете за навредата на министерката врз пратеничката дека таа не била меродавна да одредува колку чини ручекот семеен зашто немала деца.
Демек семејство немала.
Ех, Димитриеска Кочовска, Кочовска, а едно „извини“.
Пробајте.
Малку ќе боли ама …