Еден од најпопуларните онлајн ликови во Македонија, Влатко Васиљ, во интервју за Радио МОФ, говори за сатирата како одговор на пропагандата и критиката со која обидува да внесе кислород во општеството.
– На конференцијата за социјални медиуми и активизам „Engage” присуствувате по втор пат. Колку е значајна оваа конференција за онлајн заедницата во Македонија?
Можеби е најзначајна, затоа што досега не се организираат никакви настани во кои онлајн светот би се префрлил и офлајн. Ова е единствениот јавен настан што се организира, за да се покажат луѓето што не се јавни фаци а делуваат по социјалните медиуми.
– Вашите статуси и постови доминираат на Фејсбук и на Твитер. Ви одзема ли многу време ваквиот Интернет активизам?
Не ми одзема време зашто тоа ми е секојдневието. Ако не сум на лаптоп, сум на мобилен и кај и да сум, на Интернет сум. Цело време сум онлајн и мислите кои ми доаѓаат дури и кога мијам садови, потоа ги пренесувам онлајн.
– На „Engage“ говоревте за сатирата како одговор на секојдневието и пропагандата. Кој води во моментов, пропагандата или слободното изразување?
Пропагандата води, но истовремено е поттик за да се развива сатирата. Ако пропагандата е промашена и ефтина, таа води до сатира. Луѓето како мене, како Сеад или Бетмен, најчесто ја користиме сатирата за да кажеме нешто што не ни се допаѓа и што мислиме дека треба да биде подложено на критика. Но тука сме негде, 2:1 е резултатот J
– Се обидел ли некој да влијае некако за да ги повлечете вашите статуси? Имало ли обиди да ве замолчат?
Досега сум немал обиди да ме замолчат. Сум имал спротивставување на ставови и се додека тие дебати се воделе, во рамките на умереноста и без навредување и без лични конфронтации, тоа е во ред. На многу луѓе кога ќе им го кажам ова им е чудно, но мене не ми е чудно. А и зашто би имал? Општество без критика е општество што умира, а општество без хумор и без критика е општество што мачно умира.
Во продолжение може да го слушнете целото аудио интервју со Влатко Васиљ.